教會向同志伸橄欖枝

morris_2007

發約章籲信徒「愛心」接納

【明報專訊】曾經公開反對平權立法嘅余達心牧師，噚日喺播道會恩福堂帶領百幾名信眾參與《真愛同行牧養約章》立約禮，呼籲教會同基督徒用真愛建立一個同性戀者友善嘅教會，大會方面話有近90個團體同9000人聯署。基督教教會對同性戀者嘅態度轉變，原來係因為5月初時候，有近30個基督教領袖，包括昔日高調反對同性戀行為嘅林以諾牧師，發起約章行動，叫大家要以愛心接待同性戀者。


「唔代表對同志理解轉變」

《真愛同行牧養約章》入面清楚講到「教會不應排斥（同性戀者），須以愛心接待，讓他們認識福音」。《約章》秘書處發言人麥沛泉就話，教會尊重每個人唔同嘅意願，亦願意接納同包容同性戀者，因為呢個係多元社會。不過，教會話咁並唔代表教會對《聖經》同埋同志嘅理解有轉變，而約章亦話「世人有罪，需要悔改」；對於有「同性性行為」嘅人，教會應該幫佢哋「在愛中挽回」。


團體歡迎 盼早推反歧視草案

教會突然伸出橄欖枝，爭取性傾向歧視立法陣線發言人Tommy仔就非常開心教會有咁大嘅讓步，佢話依家教會公開接納同性戀者，就可以消除彼此嘅誤解。不過，Tommy仔最希望政府盡快推出反歧視法嘅草案，等佢哋可以就住當中嘅細節同社會各界同教會討論。

明報