政情：炒佔中D-Day冷飯 姚松炎 范國威等住撞板

morris_2007

由民主派團體成立「一地兩檢關注組」表明要盡全力阻止高鐵一地兩檢方案通過，身兼關注組副召集人嘅立法會前議員姚松炎透露，月底會舉行「商討日」（D-Day）討論。記得當年港大法律系副教授戴耀廷發起佔領行動時，就引入D-Day嘅討論模式，希望可以做到由下而上嘅民主，然而佔領行動無按預期發生，仲搞到「一鑊粥」。關注組今次抄橋舉行D-Day，最終會唔會又撞板收場呢？

反一地兩檢 月底商最終替代方案

政府同民主派議員喺高鐵一地兩檢方案上存在重大分歧，民主派批評方案係割地賣港，犧牲司法管轄權，更加違反一國兩制原則及《基本法》，有指下月立法會復會後，政府就會以決議案方式將一地兩檢方案提交立法會表決，一地兩檢關注組試圖阻止方案通過。

繼早前擺街站收集聯署，一地兩檢關注組尋日就發起單車遊行，希望市民可以關注一地兩檢問題。姚松炎同立法會前議員范國威都有出席單車遊行，姚松炎話單車遊行同街站收集聯署只係第一階段嘅工作，下一階段佢哋會喺本月中舉辦公開論壇，邀請唔同替代方案嘅發起人闡述方案嘅優點同可行性，到時有質詢環節，亦會邀請運輸及房屋局局長陳帆出席。而喺論壇之後兩星期會進行公眾諮詢，並喺月底舉行一地兩檢關注組內部D-Day，決定最終嘅替代方案，並且會同政府討論。

四年前戴耀廷曾辦D-Day討論政改

將方案以論壇同D-Day方式討論嘅做法講講吓似曾相識，記得四年前戴耀廷醞釀「佔領中環」行動嗰陣，都曾經以D-Day由下而上討論一個市民支持嘅政改方案，當時D-Day嘅終極方案係支持「公民提名」，不過政府唔接受，最後就發酵成歷時七十九日嘅佔領行動，證明D-Day方式嘅討論係唔可行。時至今日，關注組竟然「唔識死」抄橋舉行D-Day，難免令人聯想到會再次撞板收場喇！

東方日報