周浩鼎墮假局撞正網民狙擊

morris_2007

網民力量等人噚日喺尖沙嘴海旁舉辦「有本事就咪封殺創作自由」大巡遊，以示對版權條例無豁免惡搞嘅不滿，撞正畀人「騙咗」到場嘅青年民建聯主席周浩鼎，周仲畀網民捉咗去發言（持咪者）。（尹錦恩攝）

【明報專訊】公眾人物好多時都會獲邀出席唔同場合，不過青年民建聯主席周浩鼎噚日就懷疑畀人設局玩咗一鑊。事緣噚日網民力量喺尖沙嘴海旁舉辦咗個反對版權條例唔豁免惡搞嘅活動，咁啱周浩鼎又聲稱接受咗一個學生團體嘅邀請，同時間、同地點出席有關西九文化區嘅活動，結果去到之後，就畀成班網民狙擊，要求佢簽名支持有關惡搞嘅事。

獲邀出席活動    去到現場無影

周浩鼎話，其實佢噚日一去到就發現唔對路，因為只見到網民嘅活動，但佢獲邀、聲稱叫「藝．青年」嘅活動就完全唔見人，於是都行到好遠，諗住打畀一直聯絡佢、自稱姓伍嘅聯絡人，但就畀班網民發現佢，成班人立即走埋去，令佢好錯愕。

民建聯陳鑑林早前講咗啲批評惡搞嘅言論，令到唔少網民好不滿，覺得民記係怕畀人惡搞，噚日周浩鼎不知就裏畀班網民捉住，要求佢支持版權條例要豁免惡搞，佢話自己無留意呢條條例，所以堅決唔肯簽，但就大嘆無奈，竟然咁樣畀人呃咗去一個假嘅活動，只怪自己無問清楚活動細節。

http://www2.news.sina.com.hk/news/2/1/1/2510472/1.html

無眼睇!

孤寂如雲

中伏:escape: