倘加學額 吳文遠願叫CY契哥

morris_2007

特首解畫為何不「微服出巡」

【明報專訊】特首梁振英（CY）噚日去天水圍見市民約一個半鐘頭，一副戰鬥格咁落區，但一開始就話，有人問佢點解唔「微服出巡」，質疑佢公開落區係做騷，佢於是話其實自己上任至今都去過元朗十幾次，仲去買魚、食咖喱，面對台下大部分都係建制支持者，佢更發表約15分鐘嘅「惹火」言論，但唔少時間都係跟稿讀。


CY：到元朗十幾次

有年輕人發言時希望CY做好內交工作，令佢哋有更多發展機會，CY回應時講到大學學位問題，台下嘅社民連吳文遠隨即大叫，質疑現時每10個中學生只得兩個可以喺本港升大學，梁振英立即反駁，同「吳生」講好多人都去台灣等地升學。


吳文遠後被抽中發問，再問到學生升學問題，佢更表明如果CY肯增加大學學位，「認你做契哥都得！」此言一出，隨即被在場特首支持者大叫「契弟」。梁振英並無回應係咪加學位，只係話吳文遠對本港大學教育了解落後。


CY後門出入   快必祝生日快落

CY多次強調好願意接觸市民，不過佢噚日出入會場都走後門，無行去會堂外嘅示威者附近。另外，唔知CY噚日咁興奮係咪同佢今日59歲生日有關，人民力量譚得志（快必）記得佢今日生日，噚日就喺會場外，祝佢「生日快落台，如果唔落台就（農曆）七月十四日落地獄」，又大鬧政府係三無﹕無恥、無賴、無能。
明報