政情：陳穎欣議辦開幕 老竇勁緊張

morris_2007

工聯會（工記）小花陳穎欣同立法會議員陳婉嫻（嫻姐）嘅聯合辦事處尋日開幕。前者好唔容易先做到深水埗區議員，同樣投身工運多年嘅爸爸工記前副理事長陳志光，當然唔會錯過呢個重要時刻，仲緊張大師上身，全程充當攝影師，仲不斷幫台上嘉賓影相，完全冇停過手，真係愛女心切呀！

陳志光話睇到阿女辦事處開幕真係好開心，仲大爆其實穎欣同妹妹本來係幫新民黨主席、立法會議員葉劉淑儀先，後來先幫嫻姐手。阿女年紀輕輕就當選做區議員，陳志光會唔會擔心阿女太忙識唔到男仔o架？佢就笑笑口話「呢個就由佢（穎欣）自己諗啦！」佢又話冇介紹男仔畀阿女識，人生歷程由阿女慢慢磨練，將來係點由阿女決定，唔使阿爸諗o架！呢個爸爸對女兒相當放心呀吓！

唔少人都知道陳穎欣係讀法律出身，讀書成績相當好，仲曾經考到兩年獎學金添，原來佢妹妹喺城大讀旅遊都攞第一名，仲打算讀公共行政碩士，唔知妹妹日後會否投身工運呢？兩姊妹讀書都咁叻，陳志光就話係佢哋自己努力，屋企係太太話事，自己太忙，冇乜教女秘訣喎！

東方日報