唔怕坐監 袁彌明掌人力

morris_2007

被指形象唔夾 「視乎大家點睇」

人民力量劉嘉鴻早前辭去主席一職，噚晚人民力量執委會改選，由曾經伙拍人力議員陳志全（慢必）參選立法會嘅袁彌明（Erica）接任主席一職，相信唔少人都覺得驚訝。或者有人覺得，人力作風強硬，同選過港姐嘅Erica似乎有啲唔係好夾，但佢就強調自己係形象溫和、態度堅定。


絕食唔怕餓 最怕遇癡漢

Erica話現階段最大任務係凝聚支持者，至於形象同人力夾唔夾，就視乎大家點睇，慢必隨即話「佢好惡㗎」，而陳偉業亦話「唔好畀佢外表誤導」。Erica強調會參加公民抗命，亦絕對唔怕坐監，仲透露未來會參與民主倒梁力量嘅絕食50小時。

Erica話絕食唔驚肚餓，反而怕要喺遮打花園過夜，隨時要帶埋蚊帳去，不過佢最驚其實係會遇到癡漢，皆因之前有人跟蹤佢，單嘢仲上咗法庭！至於Erica男友、前香港人網行政總裁林雨陽，噚日亦做Erica背後嘅男人，喺記者會度坐埋一邊支持，但佢好怕醜，死都唔肯同女友合照，只係握手恭喜對方做主席喎。


男朋友當背後男人

林雨陽話，女友絕食，佢唔會參與，但一定喺身邊陪住，又話唔驚Erica做主席會忙到無時間陪佢，因為「佢不嬲都好忙㗎啦」。

明報

花瓶