阿富翻舊帳 卿姐怒走

morris_2007

電台回顧民主黨政改決定

「呢啲叫言論自由，早唞啦！」爆發股東風波嘅DBC數碼電台呢排搞緊義播，《風波裡的茶杯》主持鄭家富噚日請來前黨友、民主黨代主席劉慧卿對談，可惜二人不歡而散，卿姐一怒之下拎袋走人。

事緣阿富喺節目中不斷批評民主黨前年支持政改係錯誤嘅決定，仲話民主黨已經被中聯辦「用完即棄」。卿姐就反駁，話政改方案對民主發展行前咗一步，「點都應該袋咗先」，仲話相信若果政府2005年肯提出呢個「一人兩票」方案，都會獲得通過喎。

呢番話即時辣慶阿富，佢好激動咁話，好相信05年仲喺立法會嘅創黨主席李柱銘一定唔會支持方案，仲話卿姐當年都仲未入黨。阿富連續講咗兩分幾鐘，話至今仍感受唔到民主黨嘅誠意。佢再問卿姐點睇下次政改，卿姐話要交由黨傾，但阿富就繼續鬧卿姐無個人看法。


卿姐：自己講晒 好混帳

一直沉着應戰嘅卿姐此時爆發，批評阿富作為主持喺節目上「全部自己講晒」。阿富繼續話，卿姐話05年立法會會通過改良政改嘅講法係「唔尊重當時民主黨嘅立場」、「你不配做民主黨代主席」。此時另一主持林旭華聞到味，即時叫阿富冷靜，但卿姐已經嬲到拎袋走人，「我以為上嚟大家可以一齊傾，點知搞成咁，你哋自己講晒啦……如果呢啲叫言論自由，早唞啦，完全真係好混帳」。講完就開門走咗去。

卿姐拂袖而去後，林旭華都話阿富冇畀足時間卿姐回應，但阿富就話，自己都唔係講咗好耐，諗住畀卿姐講嗰陣，對方就話走，仲話自己對民主黨只係「愛之深、恨之切」。

明報