樂基兒淚的剖白：冇收2億贍養費

morris_2007

【東方日報】黎明和樂基兒（Gaile）的聯合離婚聲明剛好發表了一個月，昨晚Gaile回港後首次現身公開活動，就離婚一事首度開腔。聲淚俱下的Gaile大爆與黎明簽下離婚協議書，並否認如傳聞所指收了2億贍養費，並多番強調自己並非「貪錢」及「衰人」！談及被指有第三者時，Gaile更激動落淚至要中止訪問，休息10分鐘後情緒才稍見平復。

黎明與Gaile的聯合離婚聲明今日「滿月」，之前二人的「單身生活」一個天堂一個地獄，Gaile與好友風騷玩樂，而黎明卻被指要負擔2億贍養費，一直出走大江南北「撲水」搵銀。直至前晚，Gaile「玩夠」返港，當時心情靚爆的她預告會於昨晚舉行的活動回應離婚。

昨日近三時，Gaile現身中環美國銀行中心，上址律師樓林立，似乎趕住上律師樓處理離婚事宜，逗留一個小時後離去，離開時記者即上前詢問是否到律師樓時，她笑而不答，當再追問離婚一事進度如何時，其助手代為回應：「今晚先答啦！」

及至晚上，由經理人陳善之陪同現身中環出席「Marc Jacobs經典天橋時裝展覽開幕酒會」時，Gaile心情仍然輕鬆，以為她未受離婚一事所影響，但當談及與黎明離婚細節時，Gaile即表示因受離婚協議書所限，未能詳述因由，更一度激動落淚。


記︰記者　G︰Gaile
記︰離婚後心情係咪輕鬆咗？
G︰唔知點答，今日係嚟出席活動，係一個工作狀態。
記︰離婚係咪瞞咗大家好耐？
G︰其實已經分開咗一段時間，八卦雜誌寫的都唔係真。我哋有離婚協議書，唔公開得，要尊重法律，同埋黎明。
記︰真正離婚原因？
G︰大家都簽咗協議書，唔可以講，總之報道唔係真，冇第三者，寫我有船有車都唔係真。
記︰係咪拎2億贍養費？
G︰冇！我同普通人一樣，自己做嘢再儲錢，買自己鍾意嘅嘢，唔好信唔真實的新聞，對大家唔公平，黎明不嬲都唔會講，惟有我講。
記︰分開咗幾耐？
G︰一段時間，確實幾耐唔想講，自己唔開心返咗美國一段時間，同屋企人一齊，畀自己適應新生活新開始。依家我嘅事同佢冇關，佢嘅事同我冇關，唔想複雜化。
記︰唔想同佢扯上關係？
G︰唔係咁嘅意思，大家都係藝人，咁樣壓力會大啲，希望大家畀啲空間重新開始。
記︰（同黎明）仲有冇聯絡？
G︰好耐冇通電話，冇見面，但有一啲事情，會用SMS往來。
記︰係咪搬晒啲嘢走？
G︰已經搬走一段時間，只係冇人見到我搬同上律師樓，我一早接受分開，係你哋覺得突然。
記︰離婚考慮幾耐？
G︰冇話考慮幾耐，只係感情事doesn't work out（未能成功發展）。
記︰已正式離婚？
G︰進行當中。（望向經理人陳善之求救）
記︰香港法律可以分（黎明）身家？
G︰唔清楚香港法律，我唔係咁嘅人，冇八卦雜誌寫到咁衰！（說畢即眼泛淚光）
記︰同經理人約滿？
陳善之代答︰如果約滿我唔會喺度，大家仲有合作。
記︰有傳你同黎明屋企人關係唔好，尤其同黎明爸爸？
G︰唔係事實。（有冇同佢屋企人見面？）以前有，近排冇見啦。
記︰話你有新歡Cuz?
G︰（開始落淚，但強顏歡笑）唔係事實！


情緒激動中止十分鐘

由於Gaile情緒太過激動，需即時中止訪問，經理人陳善之即上前安撫。大約休息10分鐘後，雙眼通紅的Gaile心情稍為平復，並轉為接受電子傳媒訪問。


記︰屋企人反應？
G︰冇人想離婚，但感情work out唔到冇辦法。
記︰陳善之話你哋原本好sweet，係突然決定分開？
G︰我唔可以同你討論，因為簽咗離婚協議書。
記︰話你收咗2億贍養費？
G︰初頭我唔知，因為唔識中文，係同律師傾離婚嗰陣，佢讀畀我聽先知。當時聽到有唔開心，聽到話我有第三者都唔開心。
記︰傳黎明有第三者？
G︰我唔知，唔清楚，亦唔會代佢答。我哋離婚唔關第三者事。
記︰有無挽救同黎明感情？
G︰我同Leon感情已經係History，以後都唔再講。

http://www2.news.sina.com.hk/news/20121103/-15-2814331/1.html

一半都唔係小數目{:soshy:}