內地富二代行善並培訓青少年

孤寂如雲

【明報專訊】內地「富二代」新聞聽唔少，可惜一般都係負面消息居多。不過，同世界各地啲有錢人一樣，有善心、要回饋社會嘅富人都唔少，小琴噚日就同好幾位「富二代」，包括湯臣集團副主席湯子嘉（徐楓囝囝）、吳夢穎（馬萬祺孫媳婦）同埋段劉文（四通集團總裁段永基兒子）飲茶，聽吓佢哋嘅慈善大計。


主力培養弱勢少年教育事業

話說原本已經係上海宋慶齡基金會理事嘅吳夢穎，同接力中國青年精英協會主席段劉文，連同21世紀傳媒集團合作發起名為「中國心」公益專項基金，主力培養內地、香港以至澳門嘅青少年，尤其係弱勢少年兒童嘅文化教育事業喎。


邀魯平做榮譽主席

呢個基金日前喺香港正式成立，段劉文同吳夢穎齊齊出任中國心基金執行主席，仲搵來國務院港澳辦前主任魯平做榮譽主席。吳夢穎話，魯平已經發信畀內地嘅猛人，邀請佢哋加入，係咩人就要先賣個關子，只係話係啲有軍方背景嘅人。


不排除與港「百人會」合作

至於香港人較為熟悉嘅湯子嘉，都有份幫手，佢哥哥湯珈誠亦都係香港「百人會」成員，段劉文就話，將來都有可能會同香港「百人會」合作，咁真係兩岸三地富二代齊齊心繫祖國慈善事業。

小琴又問呢幾位有錢仔，被冠上「富二代」之名係幫助定係負累，段劉文就睇得好開咁話，「富二代」其實係一個不褒不貶嘅字眼，國家改革開放30年，成功讓一部分人先富起來，相信未來會有更多富人喎。

明報

從小培養回饋社會的品格，長大後就不容易變得為富不仁。