蔣麗芸長毛立會對罵

morris_2007

石禮謙：唔該你哋出去鬧

【明報專訊】民建聯立法會議員蔣麗芸真係火氣十足，噚日佢出席立法會發展事務委員會會議時，因為唔滿意社民連梁國雄嘅提問離題，兩人一度互相指罵，女嘅叫男嘅「收聲」，男嘅問女嘅係咪「傻㗎」。其他議員有啲笑住當睇戲，有啲非常無奈，呢場交鬧咗兩分幾鐘，石禮謙終於忍唔住出聲：「如果你哋鍾意鬧交，唔該你哋出去鬧。」


鬧足兩分鐘     議員「食花生」

會議有發展局長陳茂波出席，長毛質疑市建局主席張震遠嘅工作能力，認為唔應該交咁多項目畀市建局，想陳茂波回應。呢個時候，蔣麗芸插嘴話長毛嘅發言與會議內容無關，並非《施政報告》嘅嘢，叫佢「收聲」。


長毛聞言好嬲，話呢度唔係蔣家，「大小姐，我忍你唔係一世㗎，你行出去呀！你係咪傻㗎你，呢度係蔣家咩，你教主席做嘢？你傻㗎？」蔣不斷叫長毛收聲，以及叫主席劉皇發跟議事規則做嘢，長毛就反駁話「我講張震遠關你咩事？……傻你就睇醫生，搵個心理醫生」。遇到咁嘅場面，發叔都無乜符，只係提大家會議時間唔多。


被人不斷話傻，蔣麗芸塊面黑過墨斗，大罵長毛「發神經」、「收聲啦」、「你廢話」，長毛就叫佢「收聲」，在場嘅陳茂波一臉無奈，個樣苦過苦瓜。由於呢對男女聲量太大，發叔叫佢哋「靜啲」，但係都無乜作用。終於石禮謙忍唔住講「如果你哋鍾意鬧交，唔該你哋出去鬧」，加上民建聯陳鑑林勸蔣麗芸唔好理長毛，件事先至平息。

http://news.sina.com.hk/news/20130123/-2-2878466/1.html

{:sodizzy:}無眼睇