天秀墟勢掀「跳船」潮

孤寂如雲

開業不足兩個月、旨在為弱勢社群創造就業機會的天水圍天秀墟，因缺乏基建及宣傳等配套，人流稀少，不少檔口「拍烏蠅」，有的每天僅做數十元生意，甚至全日未發市。本報記者更直擊有檔販兼做「走鬼檔」，補貼檔租。有檔販不諱言租約期滿便結束營業。

「連人工都搵唔到，一個月賺埋只係夠交租！」在天秀墟賣玉鐲、花瓶及藥膏的黃女士，雖然其檔口貨品種類繁多，但光顧的顧客少之又少。本周一下午約三時，記者到達黃的檔口，對方坦言早上八時多開檔，惟至今仍然「未發市」。「好失望，如果一年後（租約期滿）都係咁，一定唔做！」黃指，她原本在天水圍天光墟擺「走鬼檔」，眼見天秀墟月租僅一千元才決定進駐，豈料開業後，每日「小貓三四隻」，頓覺心灰意冷，「做一個月散工，（人工）都多過呢度搵得千幾蚊！」


檔販盼安排表演節目招徠

「試過一日淨係做咗三十五蚊生意，淨係夠交嗰日檔租！」另一售賣女裝的檔主文小姐稱，自天秀墟開業以來，只入過兩次貨，「入咗啲舊衫都賣唔出，搞到啲客嚟嚟去去都係睇同一批衫！」文更透露，天秀墟已有八、九戶商販眼見勢色不對，欲棄租離場，「好似門口有檔賣農產品，本來做得幾好，但都捱唔住！」文希望天秀墟成功轉型，例如引入特色貨品或安排表演節目吸引人流。

開放時間為「朝八晚八」的天秀墟，共有一百八十二個月租檔位，每檔租金八百至一千元，相連檔位租金二千元，當中三十個由社企及非牟利機構營辦，其餘一百五十二個由元朗或天水圍區居民承租。記者分別於周六、周日及周一前往上址視察，發現即使是人流最多的周日，平均每小時約二百人次進場，亦有旅行團參觀，惟商販慨嘆「旺丁不旺財」。

此外，周一入場人數最慘淡，平均每小時不足五十人入場，更約有七十個檔口「無開檔」。記者訪問其中二十二名檔販，當中二十戶直指生意不好，未能收回成本，有十一戶平日生意額只數十元。

記者採訪當日下午，發現有女生果檔販從天秀墟推車仔到天瑞邨瑞意樓對出空地，兼做「走鬼檔」搵食。該女檔販在個多小時賣去多箱生果。「唔做走鬼檔，點補貼啲租？」她更補充：「由早到晚都係做到四百蚊生意，仲未扣除入貨成本，放（生果）喺度唔理，唔通等佢爛？」

東華三院稱檔主可申請寬減一至兩個月租金，可按租戶情況協調一個合適退租期。發言人稱現未有租戶申請退租，但指曾有人向該院查詢退租。

太陽報