林以諾批評蘋果日報分化社會被反駁

孤寂如雲

林以諾牧師真係惹火，4月18日日佢喺facebook就傳媒同「佔領中環」留言，「一份報紙高舉為爭取公義，實質以分化社會來尋求賣紙，還值得人尊重嗎？」，引起網民激辯，其中有人留言反駁﹕「一位牧者高舉作為神的僕人，實質卻淪為無神論政權的維穩工具，還值得人尊重嗎？」火藥味甚濃。


林批傳媒「藉機挑撥」

事緣係《蘋果日報》訪問中國基督教播道會港福堂牧師吳宗文，吳牧師早前發表《基督徒該如何看公民抗命》講話，引用《聖經》呼籲教友不應參與佔中，記者並訪問佔中發起人之一嘅朱耀明牧師，指佔中行動符合《聖經》「行公義、好憐憫」核心思想。

報道4月18日出街，林以諾牧師為此喺facebook留了兩次言，除咗上面嘅三句話，另一則留言較長，主要話佢尊重兩位牧師，但就不點名批評傳媒，「不應給不信主的傳媒藉機挑撥，破壞教會合一」，又話「相信沒有牧者不贊成『行公義、好憐憫、存謙卑的心與神同行』（最後一句常被基督徒引用時刪去，但最後一句才是最重要），但如何實踐，相信會有不同的取態」。有網友支持佢，但亦有不少人反駁佢，有人問乜嘢係「不信主的傳媒」，又有人質疑某些牧師曲解經文。Emily當日日搵過林牧師但唔成功，call台姐姐問「請問邊位搵Mr. Lam」，留了資料，但對方無回覆。

明報