曾鈺成獻吻 Ann姐high爆

morris_2007

民建聯及部分議員噚日替立法會主席曾鈺成（左三）及蔣麗芸（左四）慶祝生日。曾同蔣雖喺會議中有爭拗，但曾主席一吻化恩仇。（郭慶輝攝）

【明報專訊】拉布戰接近尾聲，民建聯噚日亦擺下「和頭酒」，幫早前喺會議廳一度爆發「罵戰」嘅蔣麗芸（Ann）同立法會主席曾鈺成慶祝生日，曾主席許願前仲「一吻泯恩仇」，輕吻Ann姐面頰，搞到壽星女high爆。不過，Ann姐話獲曾主席獻吻唔覺得驚喜，反而有啲擔心，事關唔知阿嫂（曾太）會點諗喎。


兩人生日蛋糕別致

民建聯噚日分別準備咗一個「ANN」字形蛋糕同一個有「鉸剪」圖案嘅蛋糕，送畀分別喺噚日同今日生日嘅Ann姐同曾鈺成。民建聯主席譚耀宗笑言，近日好多同事活在拉布陰霾下，發夢都聽到點人數嘅鐘聲，所以希望呢個生日party可以幫大家平衡吓情緒，食完蛋糕就「開心和諧」。


講到生日願望，曾鈺成瞄一瞄個蛋糕，話希望以後唔使再剪布；而Ann姐就希望自己唔再做「點心」，而要做「主菜」，言下之意即係想傳媒以後重視佢多啲，唔好淨係寫佢嘅八卦嘢喎。


生日願望：要做「主菜」

雖然有和頭酒，但Ann噚日又喺會議上挑戰曾主席，話要提出「規程問題」。當時會議廳只有一半議員，Ann姐要求曾主席運用議事規則第92條，睇吓班缺席議員算唔算曠工。曾鈺成冇佢咁好氣，話議員缺席係「政治問題」而非「規程問題」，仲話自己絕對唔會咁做。

http://news.sina.com.hk/news/20130517/-3-2971012/1.html

一吻泯恩仇,擺明借機索油