唔肯助查玩lift 長毛助理：要拉即管來

morris_2007

【明報專訊】立法會早前拉布期間，長毛梁國雄嘅議員助理被指涉嫌玩「lift 」，阻住其他議員去會議室，據了解，警方上個禮拜已經搵咗包括社民連黃浩銘等多名涉案者，要求協助調查，但佢哋全部無理會。對於唔協助警方調查，會唔會隨時被「低調通緝」，黃浩銘用番佢老細長毛成日講嗰句「行無愧怍心常坦」，仲話如果要拉就即管來。


立會灑水救火浸樓下屬正常

講開長毛，佢個立法會辦事處早排失火，累及多名議員嘅辦事處水浸，有唔少議員質疑立法會新大樓係咪「豆腐渣工程」。立法會行政管理委員會噚日開會討論呢件事，建築署派人解畫，話有水流落下面嘅樓層係正常，又話結構無問題。有議員讚防火灑水系統敏感，但灑水系統原來噴咗半個鐘，唔怪得樓下嘅葉建源、莫乃光議辦會水浸。


據悉，建築署幾個專業人士喺會上話，灑水向下流得咁急，係因為幕牆有罅隙預留熱脹冷縮，唔可能將佢封死，所以設計同構造合理。佢哋仲話，水流咗落去，好過積喺地板，因為地板有好多電線，浸咗仲可能搞到停電。


至於保險方面，由公帑支付買畀議員嘅物品至有得賠，但因為警方仲調查緊火警起因，依家未係時間追究責任。

http://news.sina.com.hk/news/20130522/-3-2974851/1.html

怕死?