毓民《情已逝》贈人力 「是誤會 或是彼此欠缺默契」

孤寂如雲

一手創立人民力量嘅立法會議員黃毓民早前決定退出，雖然人力前晚一致決定挽留，但毓民似乎唔多領情，好似去意已決，仲引用張學友舊歌《情已逝》嘅歌詞「是誤會 或是彼此欠缺默契」，回應人力話雙方只係產生誤會嘅講法，睇嚟人力都係時間死咗條心喇。


未來主力搞普羅政治學苑

毓民噚日心情幾好，走出嚟立法會走廊與Emily同行家傾偈。佢話，唔係3歲細路仔，做咗決定就唔會改口，朝令夕改就「唔係人」。跟住佢話，講大話嘅人地位愈來愈高，唔知想諷刺邊個。佢又話人力唔係政黨，所以無退黨潮，又認為人力選舉過後唔組黨就要解散。

不過，毓民話唔會成立新組織，但會主力搵掂普羅政治學苑新會址，希望今年9月可以開班。佢將來會同人力、社民連等「進步民主派」合作，今年七一照去遊行，但就會用My Radio名義參加。


慢必：睇埋封挽留信先決定

人力立法會議員陳志全（慢必）話，佢哋信都未寫，希望毓民畀少少時間，睇埋封信至決定。但慢必引述毓民同佢見面時，毓民叫慢必「唔好搞咁多，兄弟爬山，各自努力」，所以坦言「真係（離開）都無辦法」。人力本有3名議員，支持者希望毓民同陳偉業及慢必就算情已逝，都可以再見亦是朋友。

明報