規劃失當惹悲情 天秀墟變天瘦墟

morris_2007

【太陽報專訊】開講有話，唔怕生壞命，最怕改壞名。天水圍天秀墟開檔四個幾月，人流稀疏，生意慘淡，檔販入不敷支，日日發愁，天天消瘦，「天秀墟」變咗「天瘦墟」，問你點頂。


立法會民政事務委員會尋日討論天秀墟營運情況，檔販代表不滿墟市配套設施唔完善，人流不足，影響生意。有議員則批評墟內唔可以賣魚同肉，人流又無法提高，無助降低天水圍嘅物價。當局又點樣回應呢？民政事務局高官話喎，墟內已經獲准售賣冰鮮魚同凍肉，會研究增加出入口，又指設立天秀墟係要創造就業，畀居民有更多購物選擇咁話。


即係咁，有墟市本來好過冇墟市，當初設立天秀墟，並交由東華三院以社企形式營運，政府的確好大諗頭o架，仲講得好好聽添，一來可以杜絕「走鬼」小販，二來為區內增加就業機會，三來居民可以買到廉價貨品。點知天秀墟先天不足，後天失調，規劃唔好選址又差，配套設施天殘地缺，加上宣傳不足，搞到門前冷落車馬稀，檔販得個做字，大呻搵笨。


呢，早排有調查顯示，檔販普遍認為天秀墟選址錯誤，偏離人流，設計甩漏百出，包括缺乏遮擋陽光設施導致太熱太曬、沙地設計搞到塵土飛揚、出入口太少等等。你話嘞，咁嘅環境係人都避之則吉喇，又點會吸引到人流吖。


唔係亂噏□，好多檔販每日只能夠做幾單生意，扣埋燈油火蠟，分分鐘唔夠交租，連人工都蝕埋，有人捱唔住被迫減少開檔時間，或者索性關門大吉。


講嚟講去，天秀墟最大問題係人流不足，就算當局准許售賣冰鮮魚同凍肉，增加多幾個出入口，都只係小修小補，根本止唔到咳。話時話，如果政府有心幫助居民，點解唔可以規劃得好啲呢？


都係嗰句，一係唔好搞，要搞就搞得好好睇睇，如果唔湯唔水，盞弄巧反拙嘅咋。大家仲記得當年嘅上環大笪地嗎？貨品齊全，包羅萬有，既有各類美食，又有節目表演，夜夜笙歌，都唔知幾熱鬧，簡直係香港人嘅集體回憶。點知○三年沙士之後，當局聲稱為咗振興經濟，喺原址附近重辦「新上環大笪地」，可惜不倫不類，完全冇吸引力，結果唔到一年就慘淡收場。今日嘅天秀墟處境都差唔多咋，如果當局諗唔到計起死回生，遲早重蹈覆轍吖，叮！

http://www2.news.sina.com.hk/news/20130615/-4-2993783/1.html

索性起政府街市好過!