中聯辦唔收信 淨心BB眼紅紅

morris_2007

【明報專訊】撐政府嘅愛護香港力量，召集人陳淨心對中央及港府一片丹心，但淨心BB嘅熱血換嚟中聯辦冷待，噚日喺中聯辦門外想遞請願信卻食閉門羹。淨心BB好難受，喺中聯辦門外淚眼通紅哽咽，攞住封請願信唔放手又唔肯走，要其他成員不停安撫，叫佢「乖啦」。


一眾愛港力成員噚日先去美國駐港總領事館抗議，話佢哋組織嘅facebook群組，喺6月26日被指違規刪除咗，令佢哋好不滿，喺總領館外面喊口號，總領館派人出嚟接信。抗議之後，一行人轉到西環中聯辦請願，仲喺外面揮舞國旗及區旗，高唱國歌，表現愛國情操。但淨心BB嘅熱情換嚟冷待，佢哋雖然要求中聯辦派人出嚟接信，但喺無人理佢哋。


成員安慰﹕乖啦

淨心BB睇嚟好難受，用力握住封請願信唔放，雙眼通紅哽咽，要身邊嘅人安慰，同佢講「乖啦，聽我講啦」、「明白，知道㗎」，話大家都知道佢嘅心意。淨心BB一臉茫然，唯有聽勸告黯然離開，其他成員就將封請願信貼喺中聯辦門外鐵馬上面。

http://news.sina.com.hk/news/20130710/-3-3013373/1.html

以為自己係咩人?