鄉事派女官與鄉議局有過節

morris_2007

游說發叔唔容易

【明報專訊】政府向立法會申請撥款研究擴建屯門堆填區，但形勢唔係好樂觀，因為途中殺出鄉議局主席劉皇發唔聽政府支笛，話政府對受影響村民諮詢不足，所以會號召經民聯黨員投反對票。

噚日政務司長林鄭月娥終於出馬，聽日仲會親自落區出席屯門區議會特別會議，爭取發叔支持。林太話，呢幾日幾乎日日都同發叔溝通，但發叔似乎唔係好領情，話雙方分歧好大。Emily留意到，喺擴建堆填區撥款呢件事，政府同發叔交手嘅高官之中，林太同環境局副局長陸恭蕙咁啱同發叔都曾經有過節。

話說2011年林太仲係發展局長時，曾嚴打新界丁屋僭建物。佢嘅強硬手段，激發鄉議局強烈反彈，逾千新界居民仲燒埋影射林太嘅紙紮公仔泄憤，發叔亦批評當局喺丁屋僭建問題出爾反爾，關係一度勢成水火。


陸恭蕙曾挑戰丁權

至於陸恭蕙，1990年代佢係立法局議員，於94年挑戰新界丁權，爭取婦女平等，力爭女性原居民都獲繼承權，結果觸動原居民神經，話佢破壞新界原居民傳統，有人甚至威脅要強姦佢。雖然事過境遷，唔知兩位女高官最近嘅游說工作，會唔會因為同發叔嘅新仇舊恨而增加難度呢？

http://news.sina.com.hk/news/20130710/-3-3013374/1.html

可以借題發揮?