3D打印製建築模型

morris_2007

金門引入3D打印技術，將機場中場客運廊嘅結構模型「打印出嚟」（圖中）。董事蘇國亮（左）同執董余世欽話3D打印可將建築物結構同渠管「列印」出嚟參考建造，建築成本可慳兩成（圖片：明報）

工人可參考 減出錯

3D打印用途廣泛，本港建築業界龍頭都睇中呢種新技術，用嚟整立體建築模型，畀前線工人參考，減低出錯風險，慳錢又慳時間。金門建築高層噚日請傳媒食飯時，專登整咗個1：20嘅機場中場客運廊鋼結構模型，成本幾萬元。金門董事蘇國亮話，個模型委託科大逐件部件「打印」出嚟，然後裝嵌，同實物一模一樣。

數萬元複製機場客運廊

除咗3D打印技術，金門其實喺2006年已引入BIM（虛擬設計及建造團隊，Virtual Design & Construction Team），以數碼化模型取代平面圖則，模擬建築完成後嘅效果，喺施工前確定工序，提升工業安全。

業界：成本料減兩成

金門執行董事余世欽話，外國資料顯示，全面採用BMI最多可節省兩成成本，香港都會朝住呢個方向前進。佢又話，政府起步慢咗啲，但最近都開始對呢種技術有興趣，有望未來有更多工務工程應用。

明報