學民張秀賢患抑鬱 退居幕後

morris_2007

【明報專訊】學民思潮成員張秀賢（Tommy）噚日透露，自己6月底開始患上中度抑鬱症與焦慮症，會聽從醫生指示稍作休養，集中學民後方工作，唔再擔任前方工作。學民發言人黎汶洛（Oscar）就話，張秀賢個幾月前向佢透露病况，當時佢以兄弟身分同Tommy分析，最終Tommy選擇咗休息兩三個星期，最後都決定撤離前線。

做發言人「好大壓力」

Tommy噚日喺facebook話，佢一直唔願公布事件，係唔希望影響組織運作或內部士氣，但現時嘅形勢發展已去到「唔到我不公開自己病情嘅地步」，佢噚日接受網台D100訪問前，就話自己「本來無諗住公開」。有學民仔暗地話大班個訪問有少少針對性，先令Tommy忍唔住自爆。

Tommy喺節目中話，學民畀佢做發言人，佢都「好大壓力，可能積積埋埋」先有呢個病。節目中又提到有人話佢同建制派「眉來眼去」，但Tommy話「無辦法」，希望大家「搞清楚」，佢做事「為理念，不會為任何黨派服務」。

Oscar話，學民仔喺節目後有以WhatsApp慰問Tommy，對方回應希望病情盡快好轉。學民最近完成改選，Tommy已非學民發言人，而係成員。Emily祝佢早日康復。

明報