會費未收齊真普聯追工黨數

morris_2007

【明報專訊】民主派政黨、團體喺3月時成立真普選聯盟，早前仲推出佢哋對普選特首嘅3個建議方案同對2016年立法會選舉嘅立場，嚟緊打算落區宣傳同做民調睇吓市民意願，不過Emily聽聞，真普聯至今仲未收齊所有成員嘅入會費，而拖數嘅原來係工黨！

工黨：有拖無欠

Emily聽聞真普聯大致收齊每個屬會5000至1萬元嘅入會費，即使欠落唔少官司數嘅社民連都交咗錢，目前獨欠工黨未交會費，上月真普聯更正式發信追數。工黨同Emily講，佢哋執委早前已通過交會費，可能程序問題未過數，但肯定有拖無欠。但工黨其實都唔係打算點拖，據了解佢哋已經同真普聯講，最快今日用支票方式交會費喇。

至於七一籌款，各政黨除咗向民陣交10%籌款數字，其實真普聯內亦有提過，希望大家自願捐出5%籌款，但最終只得公民黨同民主黨響應。

雖然係咁，其實真普聯籌款成績都唔差，至今有幾十萬喺手，據講因為召集人鄭宇碩好努力出去揼心口，所以佢哋都仲夠錢搵港大做poll蒐集民意。

明報