林卓廷上水自立門戶

morris_2007

【明報專訊】民主黨總幹事林卓廷曾經做過廉署調查主任，早前爆出官員涉貪腐風波可以頻頻曝光，最近更宣告「自立門戶」。佢雖然唔係議員，但就打正旗號喺上水開設辦事處，周日開幕禮仲有主席劉慧卿撐場。

設辦事處 做好街坊工作

林卓廷近期已成日現身大東北工作，今次開辦事處，係想維繫民主黨喺北區嘅支持者，因為白鴿黨喺北區區議會只剩番一個議席，再唔做好地區工作，分分鐘全區失守，到時就真係建制派玩晒。白鴿黨派林卓廷做封疆大使，負責去上水打硬仗，至於喺咪部署2015年區議會選舉，佢就話先做好街坊工作。佢話，自己當年大學畢業，曾經喺屯門大興邨幫何俊仁做過兩年議員助理，所以好明白基層街坊嘅需要。佢話，辦事處請咗職員負責日常事務，黨友黃國桐亦仗義落區免費提供法律諮詢服務。

多一條工作戰線，林卓廷就呻辛苦，因為民主黨總部喺太子，佢又成日要去金鐘立法會開會，家仲要去埋上水，有時一日走足3場，去齊港九新界。

明報