金融界D-Day 前共青都去

morris_2007

金融界明日下午兩點至六點將會喺蘭桂坊舉行第二次商討日，活動搞手錢志健（右）透露會有中資機構職員同前共青團成員加入商討，佢哋仲歡迎所有同金融界有關嘅人出席，即使小股民亦無任歡迎。左起為商討日參加者何軍輝、區麗莊。（梁卓怡攝）

希臘餐廳希臘式商民主

【明報專訊】有人擔心佔領中環影響生計，不過有班中環人就話，無咗公義制度同公平競爭，對生計影響仲深。佢哋聽日兩點開始會喺中環蘭桂坊希臘菜餐廳SOUVLA舉辦佔中商討日（D-Day），重演希臘式直接商議民主。搞手錢志健透露，聽日商討日約有50人報名，包括港交所資深職員，仲有入過共青團嘅保險經紀，連中原地產創辦人施永青都有興趣到場了解一吓。

明日舉行 歡迎小股民

錢志健話佢哋曾邀請立法會金融服務界議員張華峰參加，但對方話有事嚟唔到，錢志健話歡迎任何同金融有關嘅人出席，即使小股民亦無任歡迎。

參加者：佔中損失似打風停市

有人擔心佔中影響生計，點解呢班中環人仲咁熱血參加商討日呢？本身做基金經紀嘅區麗莊話，佔中損失最多都係相當於打風停市，而商場重中之重嘅fair play公平原則日漸消磨，對生計影響似乎更大，好似連免費電視都未必有得睇時，民主已經唔係千里以外嘅事。

有學者聲言佔中每日可致16億元損失，不過學術與實踐總有距離，主要幫金融機構做IT嘅何軍輝就話，中環只係象徵意義，事關好多金融機構嘅數據中心已搬到將軍澳，如果真心想要癱瘓經濟，咁可能要佔領將軍澳喇。

明報