捐畫人稱「假畫」真迹 民主黨搵專家鑑定

morris_2007

【明報專訊】民主黨喺黨慶將聲稱係國寶級畫家黃永玉作品《花鳥》拍賣，仲賣到30萬元，但後來被指係假畫，搞到佢哋急忙道歉，並將30萬蚊退番畀原來投到畫嘅商務及經濟發展局前局長馬時亨。Emily聽聞，捐畫畀民主黨何俊仁嘅神秘人堅稱該幅畫係真迹，民主黨已將幅畫拎畀專家鑑定究竟是真是假。

何俊仁事前並無攞幅畫去鑑定就拍賣，外間有人批評佢哋有欠周詳。Emily聽聞其實民主黨都有難言之隱，因為一般會幫人做鑑定嘅拍賣行，都有行規要求有關物品要經拍賣行拍賣，即係話如果民主黨拎幅畫去鑑定，咁佢哋就唔可以喺黨慶上籌款喇。

聽聞大班開價5萬蚊買畫

雖然幅畫拍賣唔成，民主黨仲要退錢，但似乎「假畫」仍然有市場，Emily聽聞人稱大班嘅前立法會議員鄭經翰，就諗住以5萬蚊幫民主黨買咗幅「假畫」，但民主黨當然無賣，家就將幅畫拎去搵專家鑑證。

之前一直盛傳呢幅畫由同民主派十分友好嘅壹傳媒主席黎智英捐出，民主黨中人就斷然否認，其實民主黨前主席楊森、黎智英同黃永玉兒子黃黑蠻3人屬「襟兄弟」，因3人嘅太太係三姊妹，所以有呢個誤會並不出奇。

明報