工商界巨頭反佔中記招 不設提問

morris_2007

【明報專訊】建制派高調反對佔領中環，早前佔中發起人之一朱耀明同另外兩個泛民去台灣同民主黨前主席施明德會面後，建制派即接二連三炮轟。噚日工商界多個巨頭就聯合開記者會，批評佔中引入外來勢力，雖然工商界猛人都在場，但整個「記者會」不設提問，全程5分鐘。

17人出席 場面罕見

噚日現身嘅工商界巨頭，包括中華總商會會長楊釗、廠商會會長施榮懷、工業總會主席劉展灝、總商會主席周松崗同總裁袁莎妮、地產建設商會主席梁志堅、中國商會主席陳經緯等17人，可謂齊集本港商會，咁嘅規模聯合開記招其實好罕見。

楊釗代表工商界讀出聲明，話對佔中發起人同台獨勢力會面，佢哋深表憂慮，批評對方做法不計後果，重申引入政治勢力無助落實普選，又批評佔中會破壞營商環境等。

楊釗用咗幾分鐘讀稿，眾人大合照後，大會就宣布活動完結，完全無答問環節。有人問佢哋點睇民建聯都曾經見過民進黨前主席蔡英文等一連串問題，但所有商界人士隨即搭離開，記者亦被工作人員攔住無得追問。佔中發起人早前澄清，佢哋去台灣係學習點樣和平舉行大型社會運動，同台獨無關連。

明報