港視員工追擊建制議員

morris_2007

長毛踢波入廠 爭「保外投票」

港視10個員工自願留守政府總部，成日流流長有咩好做？佢哋噚日就趁立法會多個委員會開會、好多議員喺總部附近出出入入，乘機「追擊」建制派議員，要佢哋對住鏡頭表態，解釋點解漠視民意、否決用權力及特權法逼政府交出審批電視發牌文件。「中招」者包括郭偉強、黃國健、王國興同葉國謙，仲有田北俊都畀員工捉住。

另外，社民連梁國雄前晚參與足球賽時整傷左腳踝，骨折兼脫骱，要留院數日，但佢點都會爭取「保外投票」，喺11月6日前出院，投票支持引用特權法調查發牌風波。長毛話要6星期先康復，Emily噚日致電慰問，佢話左腳仍然好痛。

長毛話，工業界林大輝有一隊足球隊，自己當日去客串玩下，不慎被踢傷，但佢唔肯講邊個出腳咁辣，「踢波好難講，都唔係大家能預計」。據悉，長毛當日由林大輝送院。

港視員工開嘅facebook專頁「政總留守抗爭日記」，噚日上載多條追擊實錄，多個被追擊議員中，Emily覺得葉國謙算最有耐性，佢一路搭電梯一路慢慢答員工提問。

相反，黃國健對答廿零秒就頭也不回咁衝入立法會，新丁議員郭偉強就答到口啞啞，派出助理擋駕；王國興仲勁，一句「未有決定，答你唔到」就搞掂。

港視員工發起捉「賴皮鬼」

港視員工表明會繼續追擊其他建制議員，噚晚仲發起「全城捉鬼敢死隊，追擊立會賴皮鬼」活動，邀請市民趁後晚萬聖節，扮鬼扮馬去政總玩番晚，兼齊齊聲討一眾「放生」政府嘅「賴皮議員」。

另一邊廂，自資嚟香港支持港視嘅英國歌手Kashy Keegan，獲邀去咗王維基屋企共晉晚餐，佢噚日上載同魔童合照，大讚王維基有遠見同有決心。

明報