政情：民陣 真普聯 遊行蝕入肉

morris_2007

由民間人權陣線（民陣）同真普選聯盟（真普聯）合辦嘅元旦遊行只錄得三萬人參與，較去年元旦大跌十萬人次。遊行人數大減，直接影響靠遊行「搵食」籌措經費嘅政團外，更令真普聯同民陣都叫苦連天，民陣計埋本身街站籌款及泛民政團嘅上繳款項後，都未必夠支付最貴嘅大會音響及燈光等三十幾萬元開支，隨時要蝕入肉。

每年元旦同七．一遊行都係泛民政團吸金嘅最佳時機，好似去年七．一遊行，各泛民政團合共籌得二百多萬元，足夠成個政團半年嘅營運開支。不過，今年元旦遊行人數創歷年新低，往年龍尾起碼要個幾兩個鐘先至出到維園，但今年唔使一個鐘，維園已經變得水靜鵝飛，加上今年遊行隊伍行得非常疏落，搞到沿途擺街站嘅政黨拍晒烏蠅。

開支逾30萬 民陣僅籌19萬

街站拍烏蠅都算喇，但隨住學民思潮同佔領中環行動等新興組織冒起，籌款「水源」自然被分薄，好似學民思潮就喺元旦遊行足足擺咗六個街站籌款。泛民之中最吸金嘅「丐幫」社民連都只係籌得十三萬元，比去年元旦遊行籌得嘅二十五萬元少咗一半，而排第二嘅公民黨亦只係籌得七萬元，比去年少咗十一萬元。而民主黨、工黨等泛民政黨亦都只係籌得三至五萬元，成績差強人意。

由於今年遊行係真普聯同民陣合辦，所以泛民政團要分別向兩者上繳百分之十五及百分之十，加埋就要上繳四分之一咁多。好似去年生意好就話無所謂啫，但今年泛民政團籌款大減，最後係咪肯科水都成問題。民陣召集人楊政賢話，今年元旦遊行淨開支都要成三十幾萬元，但民陣街站只籌到十九萬元，就算作為「大戶」嘅學民思潮同佔中肯科水百分之十畀佢哋，估計都要蝕錢收場，但暫時未知蝕幾多。

不過，最慘情都係真普聯，因為佢哋日常運作開支都係靠有份參與嘅政團夾錢，早前佢哋因為搞民意調查使大咗，幾近乾塘，真普聯召集人鄭宇碩一心諗住靠元旦遊行籌款搵經費，點知人算不如天算，籌款數目大減，如果參與嘅政團又唔肯科水，睇嚟佢哋等摺埋都得喇。

東方日報