撈亂雙辣招 湯家驊無面

孤寂如雲

政府早前分別推出買家印花稅（BSD）、額外印花稅（SSD）同雙重印花稅（DSD）三項辣招壓抑樓市需求，立法會隨即成立兩個委員會審議三條草案。立法會尋日第十三度審議有「雙辣招」之稱嘅BSD同SSD，打擊非本港永久居民或以公司名義炒樓嘅行為。但公民黨湯家驊喺問問題時竟然誤將SSD當成DSD，亂咁發言，仲要畀政府官員當面揭發佢唔熟書，認真瘀爆。


開會發夢 SSD當DSD

湯家驊曾經記錯個案，死撐自己間屋嘅玻璃屋屬豁免規管類別，到尋日開會時，又矇查查質問當局點解要限制港人買樓，聽得與會官員一頭霧水。經過一輪對答，湯家驊知道自己搞錯，竟然仲寸人「原來講咗咁耐都唔知我講緊乜」，對方惟有指出湯家驊嘅問題屬於DSD範疇，而唔係會上討論嘅SSD。

不過湯家驊仲繼續蠻不講理話委員會一齊討論三項辣招，搞到連主席李慧琼都幫口話立法會有另一個草案委員會審議DSD。湯家驊之後雖然改口問當局點解唔豁免港人公司繳交印花稅，但已改變唔到佢開咗十三次會仍然發緊夢嘅事實。

東方日報