政情：收料站：學民骨幹成員紛退出

morris_2007

學民思潮未來一個月都會花好多時間推動學界方案，但在此關鍵時刻，我哋就聽聞佢哋有骨幹成員、反國教「絕食三子」其中兩人林朗彥（Ivan）同黃莉莉，以及成員朱偉聰決定分道揚鑣，未知對學民前路是禍是福。

其實Ivan退出學民已經係公開嘅秘密，佢上月底喺社交網站將個人狀況更新為「離開學民思潮工作」，到今個月初又話「剛離開長期負責的設計崗位」，所以要「搲job」，而佢以前喺學民思潮一向都係負責文宣工作。我哋問過Ivan，佢就承認同學民思潮嘅政改路線唔同，佢認為唔應該只係着重推廣某個政改方案，又話學民思潮未能明確話畀市民聽，六二二公投後嘅行動方向，覺得自己嘅睇法喺學民思潮中難以實踐。

林朗彥：和平分手

相反，Ivan大讚學聯提倡公民提名係底線，唔通佢想好似學民思潮前成員張秀賢咁投身大學社運？佢就坦言會「深入參與」。至於同召集人黃之鋒關係，佢就形容係「和平分手」，強調唔係分裂喎。黃之鋒就承認，佢哋離開咗，但就話係個人選擇。

東方日報