高海寧要求高 女神拒收兵

morris_2007

高海寧（高Ling）是不少男士心目中的女神，新劇中扮演賣魚妹的她，乃金剛的女神，但她卻盼認識「高富帥」入上流社會。現實中的高Ling自稱不是「拜金女」，亦不會收兵，擇偶最看重另一半的身高，以及最緊要錫自己和家人。

高海寧早前夥拍陳智燊（Jason）、金剛及小儀演出無綫劇集《愛情食物鏈》，演賣魚妹的她最叻劏魚和扮靚，又希望靠美貌與智慧認識「高富帥」，繼而進身上流社會。現實中，高Ling自稱不是「拜金女」，也不好名牌，另一半最緊要錫自己、着重家庭：「男仔最好多啲時間陪家人，金錢方面夠使就得。（試過同有錢仔拍拖？）未，但試過有家底比較好嘅男仔追求，當發現同我唔係咁適合時，我唔會因為佢嘅家底而勉強喺埋一齊。」

外貌屬其次

身高1米72的高Ling又指高度比外貌重要：「我冇刻意要好靚仔，順眼就OK，如果高過我就最好，同我差唔多都OK。（唔接受『長短腳戀』？）唔係，將來嘅嘢冇人知，但有得揀想高啲，因為我好小鳥依人，鍾意保護到我、好有安全感咁。」

講到周旋於「有米」Jason與「平民」金剛之間，後者更視高Ling為「女神」。自小品學兼優的高Ling表示求學時期是風頭躉，直言中學較多追求者，每朝更獲學長送愛心咖啡，可是這位「女神」卻不愛收兵：「我唔係一個咁嘅女仔，我性格比較黑白分明，唔會有灰色地帶，唔會拖住或利用對方，我會一口拒絕對方。」

剪短髮轉型

高Ling又否認是「女神」，自言個性不太女性化，甚至甘願為角色剪短髮：「通常啲女仔好保護自己身體每一吋肌膚，我就隨意少少，嗰日好攰會落完妝就瞓，我唔係好注重保養，其實都想剪短髮好耐。（肯剪男仔頭？）監製覺得我個樣襯就OK，入行七年一路keep住呢個形象，都希望突破少少，做個唔同高Ling嘅角色。」

東方日報