謝安琪內地巡唱叫停傷心喊爆

morris_2007

自言曾爆喊的Kay，對於令內地歌迷失望感非常內疚。

天后謝安琪（Kay）昨日大騷香肩和長腿出席演唱會香港站記招，期間無奈透露內地逾十場巡唱全部暫停。她解釋因多個原因造成，但據知是與她被指前年在佔中期間到金鐘撐學生有關。對於內地巡唱暫停，Kay坦言是個打擊，亦為兌現不到與歌迷間的承諾感內疚，更曾為此傷心喊爆！提到演唱會後將休息一年賺少千萬，Kay坦言只想珍惜與家中兩老相處的時間，亦不排除乘機造人！

索媽天后謝安琪（Kay）將於4月15及16日，在紅館舉行紀念出道十周年的《拾回 謝安琪 數愛世界巡迴演唱會香港站》。昨日她身穿白色斜膊連身短裙出席記招，大騷長腿之餘，事業線若隱若現。

方大同驚喜加「料」

期間好友方大同驚喜現身，送上香料籃子並解釋禮物寓意：「我幫Kay作咗首《香女人》，舞台上佢係香女人，知佢做完演唱會會休息一排，所以送呢個畀佢煮飯用。」問到會否任Kay嘉賓時，方大同則搞爛gag謂：「我一定到，如果我可以(O既)話。」場面搞笑。

Kay受訪時表示十周年個唱很有意義，想藉此感謝一直以來幫她的人。Kay又自爆原定在內地舉行超過十場巡唱，但可惜因多個原因而要全部暫停：「我都覺得好可惜，因為歌迷好期待，希望依家只係延遲，之後可以辦Part 2。（知咩原因？）我冇深究，兌現唔到同歌迷(O既)承諾，令大家失望，我都內疚。所以我呼籲佢哋過嚟香港睇咗先，有機會開Part 2就喺內地搞。」問到可會覺得遺憾？Kay坦言：「曾經唔開心過，呢次係我辦最大型(O既)巡迴，但比之前仲少站數。我有喊過，係個打擊。（損失千萬？）都係其次，反而十周年紀念冇得見歌迷。」但據知內地巡唱暫停是與Kay被指於前年佔中期間到金鐘支持學生有關。

讚老公獲金像提名

至於提到香港站演出，老公張繼聰屆時可會上台？她表示對方要拍劇，很難攞假，有時間來看已很開心。至於囝囝張瞻，她則謂：「佢依家8、9歲，呢啲年紀好難估佢心情，前一刻應承你，可能轉頭又會反口，所以唔好預佢。（叫佢伴舞或行catwalk？）冇預佢，但如果佢忽然興起上台跳舞我都歡迎。（淨係開兩場？）暫時係，希望可以加爆到4場。」

提到個唱後將休息一年，Kay解釋是想珍惜與家中兩老相處時間：「近幾年爹哋媽咪記憶力開始差，尤其是媽咪，所以趁佢哋仲壯健想抽時間陪佢哋去旅行。（乘機造人？）係可以喺呢一年發生，但冇得強求，如果咁幸運生到小朋友就好圓滿。」問到放假一年損失千萬要靠老公賺錢，Kay笑言對方現時大把本錢。提到老公入圍《金像獎》「最佳男配角」，她指老公預了陪跑：「好朋友白只都入圍咗，我哋都買重佢，阿聰係評審之一，佢都將佢個票投畀白只。（有得陪跑都戥佢開心？）梗係，我話佢『有得提名，的確好型』。」

東方日報