政情：財案質詢 長毛似起底

morris_2007

立法會議員每年都會就財政預算案向政府提出書面問題，但有時實在會令人懷疑議員提問嘅動機。經常出入法庭嘅社民連議員梁國雄（長毛），就向司法機構提出廿一條問題，但大部分圍繞九龍城裁判法院運作事宜，當中包括問及保安、升降機保養維修、泊車位數目，甚至係清潔、滅蟲及滅鼠次數，難免令人懷疑佢係想耗費司法機構資源去解答問題吖？定係想搜集資料去投訴司法機構呢？

保安員制服都問埋

長毛嘅提問可算係巨細無遺，較為正路問題係查詢各級法院法官及司法人員薪酬及編制、過去三年司法機構及內地有關部門交流或活動詳情、投訴裁判法院數字。其問題亦細緻到九龍城裁判法院嘅保安公司名稱、合約期、持牌保安員數目；過去五年升降機維修次數、日期、時間；有冇無障礙設施、聘用殘疾人士、節約能源，以至外判保安員係咪有劃一制服；而各個法院清潔、滅蟲及滅鼠次數都有問到。

此外，長毛甚至問及法院停車場泊車位使用率，包括九龍城裁判法院露明道門口及屯門裁判法院地下不准泊車位置，過去三年有幾多私家車或電單車違例泊車。最有趣嘅係，長毛問及當有人喺九龍城裁判法院示威，法院有冇通知警方喺法院範圍維持秩序？難免令人懷疑佢係為自己日後示威提問。

「只係想知點使公帑」

長毛回應就話，司法機構一向較少人理會，但近年開支以倍數上升，下年度就增加百分之十三點五，他只係「想知點使公帑」，純粹了解一下。至於係咪為咗投訴法院，他未有否認，只稱「投訴人哋，唔可以亂嚟」。根據司法機構回覆，近幾年五個法院每年嘅清潔及滅蟲鼠服務費用超過三百萬元，而每年滅蟲滅鼠工作超過廿五次，莫非法院嘅蟲鼠患很嚴重？

其他議員亦有問及各類數字，截至今年三月八日，喺各級法院展開同佔領行動有關嘅案件共有九十宗，六十六宗屬刑事，廿四宗屬民事；由裁判法院處理同旺角暴亂有關嘅案件共五十宗。至於去年入稟申請司法覆核許可有二百五十九宗，司法覆核案件則有七十七宗。另去年有二萬一千幾宗入稟離婚個案，較前一年微跌五百宗。

東方日報