政情：人力 社民連 為選票「復合 」

morris_2007

自稱「進步民主派」嘅人民力量（人力），當年由社民連分裂出去，但隨着時間過去，加上激進本土派崛起，兩大票源類近嘅陣營亦不得不為咗選票而選擇走上「分久必合」呢條路。據了解，人力、社民連希望透過協調，希望於九月立法會選舉由現有三席「翻一番」奪取六席。不過，同樣走「有底線抗爭」嘅學生組織亦殺出來分一杯羹，三席變六席呢個主觀意願，仍有待學生「首肯」，否則隨時變成五區齊齊攬炒。

據了解，人力、社民連就五區協調，曾與學聯前秘書長羅冠聰及前學民思潮發言人黎汶洛等有意參選嘅學生召開過幾次會議，初步計劃由社民連外務副主席黃浩銘轉戰新界西，夥拍人力立法會議員陳偉業（大舊），望奪取兩席。一直有傳大舊想退下火線，人力亦尊重大舊意願，一旦大舊決定交棒，人力黨友隨時會補位參選。

票源相近 與學生組織難協調

九龍西選區方面，社民連擬派出新任主席吳文遠出戰，香港島選區就讓位予人力主席袁彌明，而人力嘅黃大仙區議員譚香文就會代替社民連陶君行出戰九龍東選區。至於人力立法會議員陳志全（慢必）及社民連立法會議員梁國雄（長毛）就留守新界東選區。總之雙方盡量做到五區互不「界刂」票，除咗新界東有望保留兩席，其餘四區各取一席，或於新界西連取兩席，認真大想頭。

不過，學民思潮暫停運作之後，分拆出新政黨亦與部分「同路人」出戰五區，其中羅冠聰及黎汶洛分別出戰香港島及九龍東，有「小麗老師」之稱嘅劉小麗及土地正義聯盟朱凱迪就分別角逐新界東及新界西；而最近更有傳學聯前正、副秘書長周永康及岑敖暉疑將以同一張名單出戰九龍西選區。未計激進本土派嘅五區名單，單係票源相近嘅「進步民主派」已於五區分別拆出至少兩隊參選，假如雙方毫不退讓，堅持雙雙出戰，分分鐘五區齊齊攬炒，只會令傳統泛民政黨、激進本土派及建制派漁人得利。

東方日報