政情：鄉議局內訌 組黨受阻

morris_2007

倡議組黨的鄉事派經常將「為新界人發聲」、「團結新界力量」等口號掛喺口邊，更揚言會有逾萬人加入新界黨。不過，尋日有來自十五個鄉事委員會（鄉委會）嘅成員舉行聯合記者會，公開表明反對以鄉議局名義組黨。鄉議局由廿七個鄉鄉委會組成，今次逾半鄉委會齊聲反對組黨，亦反映組黨一事似乎係有人一廂情願。

鄉事派組黨醞釀多時，早前更來勢洶洶，似乎事在必行，但隨住事態發展，組黨一事愈講愈縮。直到尋日，沙田鄉委會主席莫錦貴更牽頭，同荃灣、青衣、離島等十五個鄉委會代表舉行聯合記者會，反對以鄉議局名義組黨，明顯係想同組黨劃清界線，甚至打沉組黨計劃。

侯志強踩場 莫錦貴發火

不過，主張組黨嘅上水鄉委會主席侯志強並非省油的燈，率領數十名村民「踩場」，直指鄉議局未能發號施令，管理不到各鄉嘅工作同表現。莫錦貴隨即發火，指唔可以話鄉議局未能發號施令，但侯志強就質問莫錦貴：「貴哥，你做咗咁多年，你運用（過）咩權力，為鄉民做過乜嘢？」雙方火藥味甚濃。

對於主張組黨嘅鄉紳堅稱要派人參選，不再為其他黨派抬轎，莫錦貴就反駁，指局方曾於一二年派邱榮光參選立法會，當時鄉議局前主席劉皇發曾致電多名鄉委會主席，「結果有幾多人幫手大家知」，言下之意係鄉事派一盤散沙，就算組黨派人出選亦未必會贏，「唔通出咗去就可以一個打十個？」

莫強調「唔好拎鄉議局較飛」

莫錦貴強調，鄉議局係按法例第一○九七章成立，係法定諮詢機構，若以鄉議局名義組黨，「人哋幾時郁一○九七章都未知」，重申「唔好拎鄉議局較飛」。

侯志強同十八鄉鄉委會主席梁福元則喺會上老調重彈，指組黨並非個人意願，只係新界事務「燒到埋身」，「個個都話唔組黨就無運行」。

侯志強亦重申，一人做事一人當，佢組黨同鄉議局無關。不過，作為鄉議局中人，組黨與鄉議局可唔可以完全切割，將成為疑問，難免有人質疑若將來鄉議局同新界黨派人參選，新界人應該撐邊個呢？

東方日報