政情：漁農界發炮 清算高佬賢

morris_2007

今屆立法會議員嘅任期仲有幾個月就屆滿，又係埋單計數嘅時候，而漁農界人士就率先發炮，大彈漁農界議員何俊賢（高佬賢）毫無政績，完全唔了解業界嘅需要，係外行人管內行人，令業界怨聲載道。講到咁火，睇嚟高佬賢真係得罪晒業界喎。

上年三門仔魚排發生大火，有受影響人士尋求高佬賢協助，希望可盡快回復原狀。點知高佬賢全程潛水，最後要靠漁民組織出手解決，引起部分漁民不滿。而事距幾個月後嘅筲箕灣避風塘三級火警，高佬賢已吸取教訓，起碼會到現場視察情況，但業界依然睇唔過眼，批評佢做騷無實際幫忙，仲話其黨友、議員鍾樹根仲落力添！

因為涉及漁民嘅火警增加，保險公司打算由今年九月起提高漁船嘅保費，由一百萬元增至五百萬元，大船嘅保費更高達一千萬元！高佬賢就被指無反應，從無喺議事堂為呢件事發聲，質疑佢唔明白業界困難，真係彈到佢體無完膚。

業界鬧爆只做門面嘢

活雞亦係漁農界重要議題，尤其係內地暫停活雞供港近一年半，嚴重影響活家禽批發商生計。雖然高佬賢曾組團拜訪廣東省，交流內地活雞同雞苗供港問題，但佢當住批發商面講過「有雞苗就得，唔使有毛有翼嘅大雞」，搞到批發商極之不滿，認為佢無正視問題，只做表面工夫。

何全盤否認相關指控

其實，高佬賢亦有為活牛供應發聲，希望增加代理牌照打破五豐行壟斷，聽講仲託人大代表向商務部了解添！但業內人士質疑高佬賢能從中獲利，認為佢只幫手握選票嘅朋友爭取，形容佢為人投機取巧、練精學懶，做事只為議席。

高佬賢就否認有關指控，重申推動開放活牛供應市場並唔涉及個人利益，而係為市民同業界爭取福利，認為做法能夠穩定甚至將牛肉價格下調，可以畀市民更多選擇。至於三門仔魚排大火一事，佢話無收到直接求助，但有透過其他人到場視察，又話自己持開放態度，歡迎業界隨時反映意見。唔知高佬賢呢番解釋，係咪可以平息到業界嘅怒火呢？

東方日報