中環出更：投訴梁游 工聯會寸新民黨跟風

morris_2007

青年新政梁頌恆、游蕙禎兩人嘅宣誓風波沒完沒了，誓詞內容被狠批為侮辱國家、種族歧視。工聯會已一早到平等機會委員會投訴，但新民黨就慢咗幾拍，前日先去投訴，點知呢個行為就引起工聯會中人不滿，認為係新民黨跟風，借機抽水囉！

針對今次嘅宣誓風波，工聯會反應相當迅速，早喺星期二就聯同多名抗日老戰士去平機會投訴，要求依法制裁梁、游兩人，但新民黨葉劉淑儀同容海恩就喺兩日後先去平機會，除咗投訴梁、游兩人，亦一併將熱血公民鄭松泰倒插五星紅旗同區旗一事作出投訴。據了解，工聯會立法會議員麥美娟對新民黨跟風極為不滿，仲乘機寸爆早前失言批評工聯會嘅容海恩。

容海恩曾指工聯會老土

容海恩喺立法會選舉後，指工聯會選舉失利係因為未能與時並進、未能迎合社會潮流，呢番言論就被視為指摘工聯會「老土」，即時惹起工聯會中人喺facebook反擊。而新民黨今次竟然倣效自己口中「老土」嘅工聯會，跟風去平機會投訴，又難怪會觸動到工聯會嘅神經，所以工聯會中人都視新民黨旨在抽水。照咁睇嚟，工聯會唔會就咁就算數，相信好戲陸續有嚟。

東方日報