政情：田二少唔聽話 建制謀斷財路

morris_2007

立法會議員田北辰（田二少）早前不敵七年之癢，連同六個區議員退出新民黨，與主席葉劉淑儀分道揚鑣。跳船之後嘅田二少突然變成「建制壞孩子」，不時同政府唱反調，據聞，建制派密謀下一年度立法會，拒絕由他再出任財務委員會副主席，改由體育、演藝、文化及出版界議員馬逢國、民建聯（民記）陳克勤或工業界議員吳永嘉（Jimmy）出任下一年度副主席，趕絕田二少。

夥泛民唱反調 難再掌財委會

立法會今個立法年度即將完結，又係時候泛民同建制派討論一下各事務委員會主席人選安排。據了解，建制派初步認為退黨之後嘅田二少經常同政府唱反調，好似財委會審議迪士尼樂園擴建撥款時，聯同泛民議員大鬧條款係「喪權辱港」，為泛民製造彈藥，唔少建制派都指佢「唔聽話」，認為唔可以再出任重要職位，包括財委會副主席。

有資深建制派議員透露，下一年度財委會副主席有意改由克勤、Jimmy或馬逢國其中一人出任，長遠培養佢哋喺今屆最後一至兩年成為主席。據聞，作為建制派副班長嘅克勤係副主席首選。不過，克勤要成功接任有兩大阻礙，一來佢係直選出身，若然剪布會有更大壓力；另外同為民記嘅李慧琼已經係內務委員會主席，擔心有其他建制派轟民記霸道。

陳克勤馬逢國吳永嘉或接任

另外亦有建制派議員提出由馬逢國或Jimmy接任，其中Jimmy有法律背景，相信有利於處理財委會工作，但最後要睇佢哋嘅個人意願。而成功培訓新一任主席之前，相信現任主席陳健波都會繼續連任。

至於田二少，該資深建制派議員直指，「佢都知自己無o架喇，佢明喇」，之後亦無多講嘞！其實，田二少同建制派貌合神離已經早有所聞，唔少建制派對佢經常漏口風等事早已非常不滿，相信都係趁佢今次退黨失去後台，一次過將田二少趕盡殺絕。東方日報