曾被指涉嫌逃稅 612基金乾塘又公開撲水

morris_2007

曾被質疑涉嫌逃稅嘅「612人道支援基金」，結餘只剩1700多萬港元，係創成立以嚟嘅新低，好明顯就嚟乾塘嘞！查實呢個基金喺10月已「告急」，唔夠2個月又再「告急」，頻頻公開撲水，睇嚟唔係好多人聽佢支笛捐錢喎。

民主派人士喺舊年反修例風波期間成立「612人道支援基金」支援示威者，基金成立超過1年，截至今年10月31日嘅財務簡報顯示，總捐款達1.7億港元，而現時可動用結餘係1700多萬港元，較8月底嘅3600萬港元，大幅下跌差唔多一半，更加創下成立以來嘅新低。

基金用以直接支援受助人嘅總額係1.3億港元，直接服務咗1萬8千幾人，提供嘅服務包括預付法律費用、借出保釋金、還押緊急經濟支援等。

面對乾塘危機，基金信託人繼10月喺報章撰文呼籲市民捐款後，再度「告急」，話急需市民捐款支持，先可以應付未來嘅支出，同埋維持財政穩健。之不過，仲有幾多人響應呼籲捐錢，就好難講喇！

東網