飛機陸續交付 大灣區航空今獲批航空營運許可證

morris_2007

疫情下全球航空業都備受打擊，不過由深圳東海航空董事長黃楚標創立嘅大灣區航空反而喺「疫市」突圍而出，東網得悉其向民航處申請嘅航空營運許可證(Air Operator Certificate)已於今日(8日)獲批，意味起航在望！

根據有關嘅航空營運許可證資料，大灣區航空可以勝任客運及貨運嘅公共交通事宜，而許可證有效期至明年10月31日。

大灣區航空公司行政總裁丘應樺日前曾指出，該公司首架航機日前已率先抵港。正所謂好事成雙，第二架航機亦將會於本月交付；該公司已聘請多名機師及機艙服務員，有部分係疫情下被裁嘅同業，預料今年底員工可達到150人。

翻查資料，大灣區航空首架航機嘅機型係波音737-800，最高載客量可達189人；若同時設有經濟及商務艙，則可運載162名乘客，並計劃於2026年擴張機隊至超過30架飛機。大灣區航空早前申辦104條航線，啟航地點係香港國際機場，當中48個屬於中國內地航點，包括上海及北京等熱門航點；其餘則涉及台灣、日本、南韓及東南亞等航點。

東網