車公批出下籤 社民連「尋春子弟」當黑

morris_2007

農曆年最大新聞，係發叔去車公廟幫香港求籤，皆因過去幾年車公爺實在好靈，港人都信到十足十，好彩發叔今次手風唔錯，求咗支中籤，籤文寓意來年穩穩陣陣，宜守不宜攻，算係咁啦！呢單新聞講咗幾日，已冇乜新point，反而一批八十後「政壇新秀」初三去車公廟為五大政黨求籤，其中社民連得到支下籤，籤文準到你唔信，值得報吓！

話說港台「政壇新秀訓練班」一支直擊小隊，分別為五個政黨求籤問前程，結果民主黨、民建聯與自由黨得中籤，公民黨得上籤，大致都唔錯，但輪到社民連時，竟求得一支下籤，籤文係：「尋春子弟過江山，進退莫由半道難；峰高海闊崎嶇阻，望斷江河未得還。」解曰：「凡事不安。」

車公爺叫社民連班友做「尋春子弟」，的確極之貼切，舊年任亮憲尋春惹禍，爆出涉嫌強姦非禮醜聞，搞到周身蟻；呢單情慾疑案曝光前，前秘書長季詩傑亦因欠上風流債，被甩拖女友上門插幾刀，而據毓民講，佢亦曾鬼拍後尾枕，供認曾與陶君行去過新花都夜總會，雖然阿陶事後矢口否認，但「尋春疑雲」仍揮之不去！

對籤文嘅一段解釋，更加係神來之筆：「妻近不賞，遠包二奶，凶險自招，防喪花街。」即係話瞞住老婆去偷食，分分鐘招來色劫，上得山多終「衰」在歡場，奉勸班友戒之在色。

至於個黨嘅前程，亦好唔「老嚟」，籤文指佢哋進退不得，又被崎嶇所阻，意謂今年條路好唔順暢，障礙重重麻煩多多。呢個預測同實情極為相符，毓民同大嚿拉隊退出社民連，長毛去留又未定，個黨冇晒超級巨星，號召力差好多，已不復當年風光，單靠阿陶獨挑大樑，好難撐得住個勢。加上毓民等另搞「人民力量」，一定睇住阿陶嚟打，社民連要在今明年兩大選戰中搶位愈嚟愈難，分分鐘應咗籤文嗰句「望斷江河未得還」，睇住啲議席被人搶走，自己一無所有空嗟歎。

花市擺檔生意大減 毓民擺明搶食

今年年宵花市，好多政黨都擺檔賣嘢，一來賺啲收入，二來可測試吓受歡迎程度。本刊記者問過各黨之生意情況，最意外係民主黨，營業額不減反增，而社民連就明顯少過舊年，如果用「花市指數」做民望評測，社民連極之唔「靚仔」。

花市收市後，埋單計數，民主黨賣貨收入六萬五千蚊，比舊年多兩萬幾，獲利兩三皮，算好理想。班友原擔心投票通過政改會失分，睇今次生意額，擁躉應keep得住，可能仲比以前多啲。

社民連生意則「逆市下跌」，舊年營業額有成二十萬，今年減到得十三萬，原因係冇咗毓民、大嚿嘅明星效應，亦欠缺「五區公投」之類議題，加上毓民另起爐灶搞「人民力量」，喺附近擺檔搶生意，連「香港人網」套《肉蒲團》有味宣傳品都賣埋，大大分薄社民連嘅生意。

社民連愈搞愈縮，連會址亦都由大屋轉細屋。○九年最風光之時，佢哋租用長沙灣工廈一個六千呎單位，淨係毓民個主席辦公室就有成幾百呎，十分豪氣，但去年黨內紛爭不止，財政收入減少，惟有搬去大角咀一個千三呎單位，面積減咗四分三，當年氣派一去不復返矣！
葉劉強攻九龍東 廖潔明披甲出戰


李丞責師傅話「虎人在今年都會有所轉變、突破、得着。內裏根源大部分都是從別人的危機而得來」，意指屬虎之人有機會三級跳。剛成立新民黨嘅葉劉生肖係虎，睇嚟同李師傅所言有幾分貼切。

年廿八葉劉同田二少、史醫生一齊落九龍東派揮春，線人話，佢揀呢區，背後有一套戰略諗法，就係準備一年後立法會選戰強攻九龍東，而上陣主將已內定由將退休嘅警務督察協會主席廖潔明擔任。

線人指，據葉劉嘅擺位，佢自己帶住史醫生出戰港島，田二少就殺入新界西，至於九龍東，將會加盟嘅廖潔明乃出戰理想人選，因為該區將增加一個立會直選議席，區內有唔少公務員及紀律部隊人員與家屬，取態較溫和，廖Sir當差多年，為同袍出咗唔少力，形象亦不慍不火，預料可以拉到一批公僕票，加埋葉劉在紀律部隊有號召力，廖Sir勝數唔低，值得一博。

原來廖Sir與葉劉早已相識，新民黨埋班之時，葉劉已說服佢加入，只因佢仍未退休，唔可以參加政黨，待今年九月正式離職後，就會名正言順入黨，然後打響鑼鼓準備一年後披甲上陣。在此之前，佢會先在區議會選舉打一場前哨戰，戰場就係位於九龍東嘅油塘區。


http://www.eastweek.com.hk/index.php?aid=10787

連車公都話社團連;P

AIRSHIP

車公支籤文真係一針見血:L

WikiLeaks

They deserve it!